«Калаўра мы не пакрыўдзілі». Дзе цяпер працуе былы старшыня Нацбанка?

Павел Калаўр — беларускі банкір, які дзесяць гадоў — з канца 2014 па вясну 2025 — узначальваў Нацбанк. Увайшоў у гісторыю як чалавек, які стабілізаваў рубель пасля зацягнутых эпох няўдалых папярэднікаў.

Як раней паведамляла «Наша Ніва» са спасылкай на крыніцы ў банкаўскіх колах, Калаўр спатыкнуўся на тым, што заплюшчваў вочы на свайго роду фінансавы арбітраж, якім захапіліся беларускія банкі (прычым перадусім тыя, у якіх менеджарамі працуюць дзеці Калаўра) на фоне дыспарытэту рублёвых ставак з Расіяй.

Гэта дазваляла банкам крута зарабляць у моманце, але падымала цану на грошы ў цэлым па эканоміцы.

З моманту адстаўкі ў сакавіку 2025 не было вядома, чым цяпер займаецца заслужаны беларускі фінансіст.

У верасні 2025 года Лукашэнка раптам успомніў пра Калаўра публічна, заявіўшы, што «яго не пакрыўдзілі». «Куды ён вызначыцца, туды няхай ідзе і працуе. Але ён хацеў бы працаваць у банкаўскім сектары. Калі ласка. Я не супраць. Я хачу, каб гэта разумелі. Таму ніхто Паўла Калаўра, як у народзе кажуць, з працы не здымаў», — сказаў Лукашэнка на нарадзе з апаратам Нацбанка і кіраўніцтвам банкаў.

Як стала вядома «Нашай Ніве», у выніку Павел Калаўр аказаўся фінансавым дарадцам (іншая трактоўка — фінансавым дырэктарам) у Мікалая Вараб'я — як лічыцца, самага багатага і ўплывовага беларускага камерсанта эпохі позняга Лукашэнкі.

З іменем Вераб'я звязваецца дыскантаваная купля Прыёрбанка праз намінальную кампанію ў Аб'яднаных Арабскіх Эміратах. У выніку «бізнэсмен удачы», меркавана, стаў уласнікам актыву ў чатыры разы даражэйшага, чым за яго было сплачана.

Заснавальнік і шматгадовы кіраўнік Прыёрбанка Сяргей Касцючэнка пасля адседкі эміграваў.

Прозвішча ж іншага топ-менеджара, Вадзіма Мацюшкіна, які з 2005 года быў намеснікам старшыні праўлення Прыёрбанка, а апошнія гады і старшынёй, знікла са старонкі, на якой пералічана кіраўніцтва банка.

Цяпер жа старшыня праўлення Прыёрбанка — нехта «Альдасары Махамед Абдула Махамед Алі», у раздзеле сціслай біяграфіі якога няма ніякіх даных пра вопыт работы на адпаведных пасадах.